|
Аватар 36 років скінчене в листопаді. Піл тысяча вершів на підкладі. Зимний, шкоцкій вітер і дощ на выгляді. Штораз скорше час жене, як на параді. Уж неє при мі кумплів, уж не жыєме в стаді, в бетоновій джунґлі, де цицакы ведут гадій (гадячий) жывот пяных царів і нацьпаных князів. То в ночи, а в ден зас на барыкаді тырают, як рабы проданы для Татарів. Глядают гев Бога – мают так дуже дарів! Хотіли бы Му дати, але Він не до тых барів ходит, што они. Він фунтів, дулярів не хоче – зрештом они хоцкі бы іх в ґамбу вдарил не розпознали бы Го – бо такій тепер нарід. І такы тепер часы. Дашто ся придарит може- впаде кус касы… Може не буде кары… Може не найдут винных… – Маме дуже пары і не ма на нас сильных – Хыбаль, же-м за старий на тоты дырдымалы… На тоты чары-мары не набереш ня, як богаты Хазары дурнуватых на тым Світі. Я іхам уж далі в жытю і на біті. Знам, бесідували: Я’ан, воз подумай закля ся попариш (попечеш). Тильо років, оген тягнул ня і бавил! Тепер уж не втечу, уж тройця до пары. З кута в кут ся мечу, як Мазуратий Гары. Домалюй ґамбу мі – не видят твари, може то і ліпше – Йол! – Календарик за місяц вішам новий – може стары мары минут, проминут, а може одварит (здобуде ся на одвагу). тота голосна частина мене, што лем ся сварит і спакуєме зас тоболок, підеме далі. Підеме самы далі ген! Підеме далі… То друга віснадцетка – доріс єм по раз другій. Не была така легка – ціла маса блудів. Ціла маса гріхів, за котры бю ся в груды. Сам як Аватар, серед обчых люди! 36 років – о три долше як Христос ходжу по тым Світі, а на плечах криж (крест) тот тягну як і Він і як Ты, і Ты, і Ты. Вшыткы зме такы самы, вшыткы зме Ісусами. Як Будды ся будиме, з Брахманом ся витаме. Енерґія ЛІ плыне! Слава нам Славяне і любов для інчых – так як написане: Шануй своіх близкых – милуй іх вшыткых! Але не вір никому – никому не вір! – Лем собі. І так што будут хотіли напишут Тобі на гробі! Ту дико, як в Найробі, хоцкі в колесо Ангелы. Так выглядат Світ сыну – такы ма сцены. Женеме як шалены, ведены гев з кута в кут. Люде дивны сут – до того ся призвычай! 36 років – в рап заперте жытя. Од трйох років не пю алкоголю – дост уж питя! Закінчыл єм етап тот! – Виджу: єст ріжниця! Наступна границя – смотр! – Прескочена: мясо! Не ім. Не хочу. Не частуй ня кобасом! Охота на кров преминула з часом. Тепер інчым пасом іхам, кусьцьок інакше. Астма уж не дусит, хоцкі не одышла на все. Певно іщы верне і зас буде ту тяжше… Якій початок – такій конец! – Добрі знам, же так тото выглядат гев – іхаме дальше. Листя падат з дерев – в нас было красше! Колиси там верну… – Приде час, то розшмарте, в краіні Антенатів на вітер мене вышмарте. На русиньскій вітер порохы вышмарте! Як приде час… … …але закля што: То друга віснадцетка – доріс єм по раз другій. Не было то легкє – ціла маса блудів. Ціла маса гріхів, за котры бю ся в груди. Сам як Аватар, серед обчых люди! |
„Avatar”
36 rokiw skinczene w lystopadi Pił tysiacza werszy na pidkładi Zymnyj, szkockij witer i doszcz na wyhladi Sztoraz skorsze czas żene jak na paradi Uż neje pry mi kumpli, uż ne żyjeme w stadi W betonowij dżungly de susaky wedut hadi żywot pianych cariw i naćpanych kniaziw To w noczy, a w den zas na barykadi Tyrajut jak raby prodany dla Tatariw Hladajut heł Boha – majut tak duże dariw! Chocily by mu daty, ale Win ne do tych bariw chodyt szto ony. Win funtiw, dulariw ne chocze – zresztom ony, chocki by ich w gambu wdarył ne rozpoznaly by Ho – bo takij teper narid. I taky teper czasy. Daszto sia prydaryt może – wpade kus kasy… Może ne bude kary… może ne najdut wynnych… – Mame duże pary i ne ma na nas sylnych – Chybal żem za staryj na toty dyrdymały… Na toty czary-mary ne naberesz nia jak bohaty Chazary durnuwatych na tym Świti. Ja icham uż dali w żytiu i na biti. Znam, besiduwaly: Ya’an, woz podumaj zakla sia poparysz Tylo rokiw ohen tiahnuł nia i bawył! Teper uż ne wteczu, uż trojcia do pary Z kuta w kut sia meczu jak Mazuratyj Hary Domaluwaly gambu mi – ne wydiat twary może to i lipsze – Yo! – Kalendaryk za misiac wiszam nowyj – może stary mary mynut, promynut, a może sia odwaryt tota hołosna czastyna mene szto lem sia heł swaryt i spakujeme zas tabołok, pideme dali. Pideme samy dalij hen! Pideme dali… To druha wisnadcetka – doris jem po raz druhi Ne była taka lechka – ciła masa błudiw Ciła masa hrihiw, za kotry bju sia w hrudy Sam jak Avatar sered obczych ludy! 36 rokiw – o 3 dołsze jak Chrystos chodzu po tim Świtii, a na pleczach kryż tot tiahnu jak i Win i jak Ty i Ty i Ty Wszytky’sme taky samy, wszytky’sme Isusamy Jak Budda sia budyme, z Brahmanom sia wytame Energia LI płyne! – Sława nam Sławiane i lubow dla inszych – tak jak napysane: Szanuj swoich Blyzkych – myłuj ich wszytkych! Ale ne wir nykomu – nykomu ne wir! – lem sobi! I tak szto budut chocily napyszut Tobi hrobi! Tu dyko jak w Nairobi chocki w koleso Anheły Tak wyhladat Świt synu – taky ma sceny. Żeneme jak szaleny, wedeny heł z kuta w kut. Lude dywny sut – do toho sia pryzwyczaj! 36 rokiw – w rap zaperte żytia Od trioch rokiw ne piu alkoholu – dost uż pytia! zakinczył jem etap tot! – Wydzu: jest riżnycia! Nastupna hranycia – smotr! – prekroczena: miaso! Ne im. Ne choczu. Ne czastuj nia kobasom! Ochota na kroł premynuła z czasom. Teper inszym pasom icham, kuściok inaksze Astma uż ne dusyt chocki ne odoszła na wse Pewno iszczy werne i zas bude tu tiaższe… Jakij poczatok – takij konec! – Dobri znam, że tak toto wyhladat heł – ichame dalsze Lystia padat z dereł – w nas było krassze! Kolysy tam wernu… – Pryde czas to rozszmarte w kraini Antenatiw na witer mene wyszmarte. Na rusyńskij witer porochy wyszmarte! Jak pryde czas… 477-YA’AN-22/11/2015-Edinburgh |
Ya’an (MYSP)
txt 477
Edinburgh 22/11/2015
Jazykowa korekta: Olena Duć
